O libro Aportacións dos Novos Investigadores ao estudo da Arqueoloxía, Prehistoria e Historia Antiga é unha obra impulsada polo Comité Organizador do I Encontro Internacional de Novos Investigadores en Arqueoloxía e Ciencias da Antigüidade (EINIACA), coa que se pretende abrir novas vías de comunicación entre os membros da comunidade científica universitaria e, á súa vez, enriquecer o ámbito académico. Trátase polo tanto, dunha publicación plural e científica levada a cabo por estudantes e investigadores que queren dar a coñecer o seu traballo no marco da Arqueoloxía, a Prehistoria e a Historia Antiga. Por este motivo, soamente serán admitidos aqueles traballos que foran expostos previamente en EINIACA e que tamén sexan orixinais, non podendo estar publicados en ningún medio con anterioridade, e tampouco se aceptarán aqueles que se atopen en trámites de publicación.